Onun sözlərinə görə, Macarıstanın Vəkillər Kollegiyasının rəhbərliyi ilə iki ölkənin eyni qurumları arasında əməkdaşlıq imkanları, təcrübə mübadiləsi və s. məsələlər müzakirə edilib və bu görüş hər iki tərəf üçün faydalı olacaq.
Daha sonra vəkil İkram Şirinov bildirib ki, o, Azərbaycanın Müdafiə Nazirliyi və R.Səfərovun valideynləri ilə müqavilə bağlayaraq onların nümayəndəsi kimi Macarıstanda Ramillə görüşüb. Vəkil R.Səfərovun hazırda apellyasiya şikayəti mərhələsində olan cinayət işi ilə tanış olub. İ.Şirinov R.Səfərov barəsində çıxarılan məhkəmə hökmünün ədalətsiz olduğunu, istintaq zamanı Azərbaycan zabitinin hüquqlarının pozulduğunu söyləyib və qeyd edib ki, bu səbəbdən məhkəmə qərarını ləğv etmək mümkündür.
«Turan» agentliyinin məlumatına görə, ölkədə vəkillik fəaliyyətinə dair suallara cavab verərkən A.Tağıyev bu sahəyə marağın az olduğunu vurğulayıb. Bunun səbəblərini açıqlamaqdan çəkinən A.Tağıyev «nə üçünsə prokurorluğa, hakimliyə maraq daha böyükdür» deyib. O, hazırda Vəkillər Kollegiyasının 600-ə yaxın vəkili birləşdirdiyini söyləyib.
A.Tağıyev bildirib ki, bu il martın 4-də vəkillik peşəsinə yiyələnmək istəyənlər test imtahanı verəcək. İmtahana qatılmaq üçün 432 nəfər kollegiyaya müraciət edib. Hakim və prokurorluq sistemində işləmək üçün test imtahanında keçid balı 60, vəkillər üçün isə 50-dir. A.Tağıyevin sözlərinə görə, imtahan üçün nəzərdə tutulan 100 sualdan 30-u asan, 40-ı orta, 30-u çətin sualdır.
2004-cü ildə Macarıstanda erməni zabitini öldürməkdə günahlandırılan R.Səfərov 2006-cı il aprelin 13-də Budapeşt məhkəməsinin hökmü ilə 30 il ərzində əfv olunmaq hüququndan məhrum edilməklə ömürlük həbsə məhkum olunub.
