«Ötən il ərzində vətəndaşlardan daxil olmuş çoxsaylı müraciətlərdə məhz müxtəlif məsələlər barədə təklif və arzular bildirilib. Bunların əksəriyyətində vətəndaşlar Azərbaycan Respublikasının Prezidenti cənab İlham Əliyevin fəaliyyətinə yüksək qiymət verərək onu daim dövlət başçısı vəzifəsində görmək istədiklərini bildirir, prezidentlik müddətinin 5 ildən ən azı 7 ilədək uzadılmasını təklif edirlər». Bu cümlələr Prezidentin İcra Aparatının sənədlərlə və vətəndaşların müraciətləri ilə iş şöbəsinin rəhbəri Süleyman İsmayılovun bu gün rəsmi dövlət qəzetində - «Azərbaycan» qəzetində dərc edilən «Tariximizin yeni mərhələsi və vətəndaşların müraciətlərinə yeni münasibət» adlı məqaləsindəndir.
S.İsmayılov qeyd edir ki, vətəndaşların Prezidentin İcra Aparatına göndərdiyi minnətdarlıq məktublarının sayı artıb: «Azərbaycan Respublikası Prezidentinə ünvanlanmış müraciətlərin əksəriyyətində, o cümlədən ərizə və şikayətlərdə Azərbaycan vətəndaşları cənab Prezidentin daxili və xarici siyasətini bəyəndiklərini bildirir və ən müxtəlif təbəqələrdən olan, ən müxtəlif sahələrdə çalışan insanlar gördüyü gözəl işlərə görə ona öz minnətdarlıqlarını ifadə edirlər. Keçən il isə bu minnətdarlıq məktublarının sayı xeyli artmışdır».
Şöbə rəhbəri müraciətlərin arasında Heydər Əliyev adına yeni rayonun yaradılması təklifinin olduğunu da yazır: «Təkliflərin böyük bir qismi ümummilli liderimiz Heydər Əliyevin xatirəsinin daha geniş əbədiləşdirilməsi, Heydər Əliyev irsinin öyrənilməsi, Heydər Əliyevin adını daşıyan yeni inzibati rayonun yaradılması barədədir».
Şikayətlərə gəlincə, məqalə müəllifi qeyd edir ki, onların sayı azalıb. Məqaləyə görə, 2006-cı ildə Prezidentinin İcra Aparatına daxil olan vətəndaş müraciətlərinin sayı 2005-ci ilə nisbətən 26,6 faiz az olub. Vətəndaş müraciətlərinin 58,3 faizini ərizələr, 41,1 faizini şikayətlər, 0,6 faizini təkliflər təşkil edib. Daxil olan müraciətlərin bir hissəsi dövlət başçısının regionlara səfərləri zamanı və Bakı şəhərində keçirilmiş müxtəlif tədbirlərdə təqdim olunub. Müəllifin bildirdiyinə görə, 2005-ci ildə belə tədbirlərdə prezidentə 5245 müraciət təqdim edilmişdisə, 2006-cı ildə bunların sayı kəskin surətdə azalaraq 2169 olub.
S.İsmayılov müraciətlərin əsasən ölkənin cənub bölgəsindən daxil olduğunu qeyd edir. Onun yazdığına görə, 2006-cı ildə Prezidentin İcra Aparatına daxil olan müraciətlərin sayı Lənkərandan 527, Astaradan 356, Salyandan 102, Yardımlıdan 85, hətta bir qayda olaraq çox müraciət daxil olan Lerik rayonundan 510 ədəd azalıb. Balakən, Zaqatala, Ağdaş, İmişli, Zərdab, Quba, Xacmaz rayonlarından daxil olan müraciətlərin sayı da 2005-ci ilə nisbətən az olub və bu fərq başqa rayonlarda da özünü qismən göstərib.
Müəllif vurğulayır ki, yerlərdə insanlar problemlərinin həll ediləcəyinə arxayın olmadıqları üçün Prezidentin İcra Aparatına müraciət edirlər.
Məqalədə əhalinin daha çox hüquq-mühafizə orqanlarından şikayətləndiyi bildirilir: «Müraciətlərin mövzular üzrə təhlili göstərir ki, 2006-cı ildə Prezidentin İcra Aparatına hüquq-mühafizə və məhkəmə orqanlarının fəaliyyəti ilə bağlı müraciətlər daha çox daxil olmuşdur. Daxil olmuş müraciətlərin 25,7 faizi bu orqanların, o cümlədən 8,5 faizi məhkəmə, 8 faizi daxili işlər, 6 faizi prokurorluq, 3,2 faizi isə ədliyyə orqanlarının fəaliyyəti ilə bağlıdır».
