Tələbələr 2006-cı ilin may-iyun aylarında azərbaycanlıların etiraz aksiyalarında minlərlə nümayişçinin tutulmasını və onlarla günahsız insanın qətlə yetirilməsini, habelə Ərdəbil zindanında saxlanılan Abbas Lisaninin acınacaqlı vəziyyətini xatırladaraq İ.Şaiqi deputat kimi bütün bunlara göz yummaqda günahlandırıblar. İ.Şaiq verdiyi izahla hamını heyrətə salıb və hiddətləndirib: «Karikatura məsələsi ilə bağlı Təbrizdə keçirilən etiraz nümayişlərində mən özüm də olmuşam. Nümayişçilərin sayı bir neçə yüz nəfəriydi. Orada başqa heç nə baş verməyib. Sizin internet saytlarında gördüyünüz şəkillər saxtadır. Bu şəkillər sizləri aldadıb!»
Tələbələrdən birinin verdiyi «Əgər nümayişçilərin sayı neçə yüz nəfərdən ibarət idisə, bəs neçə min nəfərin tutulmasını necə başa düşək və millət vəkili kimi öz müvəkkillərinizin tapdanmış hüquqlarını niyə müdafiə etmədiniz» suallarına cavabda İ.Şaiq qəribə cavab verib: «Məhkəmə qazisinin işinə qarışmaq mənim işim deyil. Deputat olmamışdan əvvəl isə ibtidai sinifdə dərs demişəm. Məktəb məsullarına tapşırardım ki, dərsə qulaq asmayan və dərsi pozan şuluq uşaqları tənbeh etsinlər».
Qızışan mübahisəyə İranın Türkiyədəki səfiri Baqiri də qarışıb: «Mən sizə bir millət vəkili ilə bu tərzdə danışmağa icazə vermərəm. Sizlər yalan danışırsınız, heç biriniz təbrizli deyilsiniz!» Səfir tələbələrdən hədələyici tonla pasportlarını göstərməyi tələb edib. Tələbələr İran səfirinin özünün pasport göstərib kimliyini sübut etməli olduğunu deyəndən sonra Baqiri təhqirə keçib və onları «yalançılar, cahillər» adlandırıb. Tələbələrdən biri əvəzində «Türkiyə kimi mühüm bir ölkədə səfiri sən olan məmləkətin halına ağlamaq lazımdır» deyib.
Sərginin özünə gəlincə, «İran Azərbaycanının qadınları» adını daşısa da, tamaşaya qoyulan tabloların əksəriyyəti İranın farsdilli bölgələrinə, o cümlədən də Təxti-Cəmşid xarabalıqlarına aid olub. Burada Azərbaycan qadınlarının həyatından bəhs edən çox az tablo sərgilənib.
