Bu gün İranın 20-dən çox universitetinin islami birlikləri bəyanat yayaraq hüquq müdafiəçilərini həbsdə saxlanan azərbaycanlı tələbələrin taleyinə biganə yanaşmaqda günahlandırıblar: «İranda tələbə hərəkatının əsas sütununu təşkil edən azərbaycanlı tələbələr 2006-cı ilin may-iyun qiyamından sonra daha da möhkəmləniblər və böyük mübarizə təcrübəsinə yiyələniblər. Ötən il 50 azərbaycanlı tələbənin inzibati komitələrə və məhkəmələrə çağırılması, mühakimə edilərək həbslərə salınması buna sübutdur».

Bəyanatda deyilir: «Azərbaycanlı tələbələr demokratik prinsiplərə riayət edərək öz milli kimlikləri uğrunda mübarizə aparır və fəaliyyətlərinin əsas istiqamətini milli hüquqların təmin olunması zəmininə yönəldiblər. Onların məruz qaldığı bütün təzyiq və təqiblərə, həbs, sıxıntı və məhrumiyyətlərə baxmayaraq hüquq müdafiəçiləri azərbaycanlı tələbələrin ağır durumuna biganə yanaşaraq bu barədə susmağa üstünlük verirlər. Biz milli kimlikləri uğrunda mübarizə aparan azərbaycanlı tələbələrin həbsə salınmasını məhkum edərək onları himayə etdiyimizi bildiririk».

Bəyanatı, İlam, Sistan-Bəluçistan, Əllamə Təbatəbai, Səhənd (Təbriz), Firdovsi (Məşhəd), Politexnik, Mühəqqiq Ərdəbili, Şahrud, Loristan, Tibb Elmləri (Təbriz), Pedaqoji (Tehran), Kirman, Bu Əli (Həmədan), Xacə Nəsir, Şəhri Kürd, Şiraz, Kaşan, Sənəti Şərif (Tehran), Zəncan, Hörmüzqan, Mazandaran, Tehran, Simnan universitetlərinin islami birlikləri imzalayıb.