Güneyli yazıçı və jurnalist Həmid Arğış (Rüstəmi) Xoy Şəhər İnqilab Məhkəməsinin qərarı ilə 1 il həbs cəzasına, 2 il isə Bicar şəhərinə sürgünə məhkum edilib. Azərbaycan Siyasi Məhbuslarının Hüquqlarını Müdafiə Komitəsindən (ASMEK) «Media forum» saytına verilən xəbərə görə, məhkəmə onun əsərlərinin nəşrinə də 3 il müddətinə qadağa qoyub.

H.Arğış Azərbaycan türkcəsində bir neçə kitabın, o cümlədən «Və sənin hekayələrin», «Qarlı Ərk» və «Hekayələr toplusu» adlı əsərlərin müəllifidir. Onun məqalələri «Ümidi-Zəncan», «Peyki-Azər», «Nəvidi-Azərbaycan», «Şəmsi-Təbriz», «Yaşıl yol», «Yarpaq» və digər qəzet və jurnallarda çap edilib.

H.Arğış 2006-cı il fevralın 21-də İranın Azərbaycan şəhərlərində Beynəlxalq Ana Dili Günü münasibətilə keçirilən aksiya və tədbirlərdə iştirakına görə Xoy şəhərində ETTELAAT əməkdaşları tərəfindən həbs edilmişdi. Daha sonra onun mənzilində və iş yerində axtarış aparılmış, əlyazmaları, kompüteri və bir sıra kitabları müsadirə olunmuşdu.