Azərbaycandan Kənarda Təhsil Almış Mütəxəssislər Təşkilatı (AKTAM) www.elmidiaspora.internet.az  saytının təqdimatını keçirib.

Təşkilatdan “Media forum”a daxil olan məlumatda deyilir ki, Milli Elmlər Akademiyasının Rəyasət Heyətində keçirilən dəyirmi masada AKTAM-ın

Təhsil Naziriliyi, AMEA, Diasporla İş üzrə Dövlət Komitəsi, Azərbaycan Texniki Universiteti, Turizm İnstitutu və AMEA-nın İnformasiya Texnologiyaları İnstitutu ilə birgə reallaşdırdığı “Azərbaycanın elmi diasporu” layihəsi ətrafında müzakirələr aparılıb.

AKTAM sədri Natiq Əhmədov bildirib ki, layihədə məqsəd xaricdə yaşayan həmvətənlərimizin – alimlərin, tədqiqatçıların müasir texnika və texnologiya sahəsində qabaqcıl mütəxəssislərin informasiya-analitik məlumat bankını yaratmaqdır (onlar haqqında ümumi məlumatlar, əlaqə ünvanları, elektron poçt ünvanları, nəşr olunmuş elmi əsərlərinin siyahısı və s.).

Layihə eyni zamanda xaricdə yaşayan, elmi-tədqiqat, innovasiya fəaliyyəti ilə məşğul olan alimlərimizlə Azərbaycanda fəaliyyət göstərən alimlərin internet şəbəkəsində daimi dialoqunu yaratmağı nəzərdə tutur.

Açıq Cəmiyyət İnstitutu - Yardım Fondunun maliyyə dəstəyi ilə həyata keçirilməsinə başlanan layihə Azərbaycanla yanaşı diaspor təşkilatlarının fəaliyyət göstərdiyi 40 ölkəni və hələlik diaspor təşkilatı olmayan, ancaq Azərbaycanın səfirliyi olan 16 ölkəni əhatə edəcək.